Duduh Durahman
Duduh Durahman | |
|---|---|
| Gumelar | 26 Mei 1939 Ciwidéy |
| Pagawéan | jurnalis, sastrawan Sunda, jeung aktor teater |
| Kabangsaan | Indonésia |
| Génré | kritik sastra, kritik film, carpon |
| Pasangan | Maya Kusmayati D |
| Anak | Radian Prasetia, Satia Sajati, Bagja Gumati, Ahmad Nur |
Duduh Durahman atawa Abah Duduh nyaéta jurnalis, sastrawan Sunda, jeung aktor teater.[1] Lahir di Ciwidey tanggal 26 Mei 1939 ti H.Iskandar Saleh Syahbana jeung Siti Aisah Carwati.[2]
Duduh kasohor minangka kritikus film jeung sastra Sunda.[2] Sedengkeun pakasaban anjeunna minangka pangarang jeung panarjamah sastra luar kana basa Sunda, teu pati loba dipikanyaho ku masarakat alatan Abah Duduh mindeng maké sandi asma lianna.[2] Radian Prasetia, Satia Sajati, Bagja Gumati, Maya Kusmayati D., jeung Ahmad Nur mangrupa sawatara sandi asma nu sok dipaké ku anjeunna nalika nulis fiksi atawa terjemahan sastra.[2] Kalungguhan anjeunna minangka sastrawan disajajarkeun jeung Muh Rustandi Kartakusuma sarta Ajip Rosidi.[3]
Dina widang sastra, anjeunna kungsi nulis kumpulan bahasan, talaah, aprésiasi, kritik, jeung pangamatanana kana karya sastra Sunda dina buku Petingan (1983), Catetan Prosa Sunda (1984), Salumar Sastra (1989) jeung Sastra Sunda Saulas Sausap(1991).[1][2] Kritikan-kritikanana seukeut pisan dina nganalisis hiji karya.[2] Alatan éta ogé anjeunna sering kapeto jadi girang pangajén Hadiah Sastra LBSS nu diayakeun ti taun 1990.[2] Taun 1993 kungsi jadi pinunjul ka II dina nulis éséi.[2]
Minangka editor, Duduh jeung Abdullah Mustafa sarta Karno Kartadibrata medalkeun Sawidak Carita Pondok(1983).[2] Tuluy minangka pangarang fiksi, anjeunna ngarang carita detektif nu dikumpulkeun dina Ajalna Sang Béntang Pilem.[2] Ieu buku heunteu ngagunakeun sandi asmana, tapi ngagunakeun ngaran aslina, Duduh Durahman.[2] Caritana ogé dipintonkeun dina wangun drama.[1]
Dina widang téater kungsi jadi aktor dina pagelaran "Khotbah Munggaran di Pajajaran" karya Yus Rusyana, garapan Liga Drama Bumi Siliwangi IKIP Bandung (1966).[2] Tuluy taun 1982 jadi Goak Nitipraja dina pagelaran "Karto Loewak"na STB (Studiklub Teater Bandung) garapan sutradara Suyatna Anirun.[2] Salian ti éta, anjeunna ogé jadi salah sahiji Pendiri Forum Film Bandung (FFB) sarta kungsi jadi girang pangajén dina Festival Film Indonesia (FFI) 1981 di Surabaya.[2] Alatan pangaweruh nu kacida euyeubna dina widang film jeung téater, sastrawan Mochtar Lubis méré jujuluk minangka ensiklopedi film berjalan.[2]
Taun 1999 Duduh dilélér Hadiah Sastra Rancagé ku Ajip Rosidi.[2]
Referensi
[édit | édit sumber]
|
Artikel ngeunaan sastra ieu mangrupa taratas, perlu disampurnakeun. Upami sadérék uninga langkung paos perkawis ieu, dihaturan kanggo ngalengkepan. |