Jalangan

Ti Wikipédia Sunda, énsiklopédi bébas
(dialihkeun ti Sanggama)
Sapasang singa di Maasai Mara, Kenya, keur jalangan. Dina mangsa "bulan madu", sapasang singa bisa jalangan nepi ka 40 kali sapoé

Jalangan, kopulasi, lakian atawa éwéan nyaéta peta ngasupkeun sirit jalu nu celegeng kana heunceut bikang kalawan tujuan baranahan jeung kasenangan.

Istilah sanggama, rarasmi, atawa sapatemon dipaké nujul ka manusa, sedengkeun pikeun vértebrata luhur (kawas singa na gambar di katuhu) disebut "jalangan" (kopulasi). Sato séjén, kayaning réptil jeung manuk, réproduksina di jero/internal, najan ngabuahanana mah na kloaka. Nu séjénna deui, misalna lolobana amfibi, ngabuahan di luar/éksternal.

Biologi konsépsi[édit | édit sumber]

Sanggama mangrupa métode baranahan dasar pikeun Homo sapiens jeung sakabéh mamalia. Nalika bucat, nu biasana dibarengan ku orgasmeu lalaki, saruntuyan kontraksi otot nganteurkeun mani nu ngandung gamét jalu nu disebut sél spérma atawa spérmatozoa kana heunceut, nu terus ngaliwatan sérviks ka rahim, terus ka solobong fallopi. Sél spérma bisa hirup nepi ka salapan poé na awak awéwé. Mun ovum subur aya na solobong fallopi, gamét jalu ngahiji jeung ovum ngahasilkeun fértilisasi jeung dibentukna émbrio anyar. Nalika ovum nu geus dibuahan nepi ka uterus, lajeng bakal dipelak na lapisan nu disebut éndométrium sahingga mimiti kakandungan.

Sanggama salawasna dianggap bakal ngahasilkeun kakandungan, iwal maké kontraséptif. Najan kitu, sanggama tetep baé bisa ngahasilkeun kakandungan, sabab kontrasépsi teu bisa ngajamin 100% jétu. Coitus interruptus atawa 'azl (basa Arab), nyaéta ngaluarkeun sirit tina heunceut pas saméméh lalaki bucat, lain cara kontrasépsi nu jétu. Puasa sanggama mangrupa hiji-hijina cara nu bisa ngajamin 100% nyegah kakandungan. Outercourse, kagiatan séksual tanpa ngasupkeun sirit kana heunceut, bisa ogé pikeun nyegah kakandungan, asal manina teu keuna kana palawangan.