Spésiés

Dina biologi, spésiés téh salah sahiji unit dasar biodiversitas. Dina klasifikasi ilmiah, spésiés dicirikeun ku ngaran dua kecap tina basa Latin: ngaran genus di hareup (Aksara hareupna kapital), dituturkeun ku istilah kadua. Pikeun conto, manusa téh kaasup kana genus Homo, sedengkeun spésiésna Homo sapiens. Ngaran spésiés téh nu dua éta (binomial), teu ukur kecap nu kadua. Ngaran binomial ieu, nu salajengna diresmikeun dina kode tata ngaran biologis, munggaran diajukeun sangkan dibakukeun ku Carolus Linnaeus taun 1700-an, antukna mindeng disebut "tata ngaran Linnaean". Harita, téori biologi nu dianut nyebutkeun yén spésiés téh éstuning ciptaan Pangéran, antukna teu bisa diganggu gugat.

Ti saprak kapanggihna téori évolusi, konsép ngeunaan spésiés robah kalawan gancang, malah nepi ka kiwari gé can aya kasapukan ngeunaan watesanana. Harti nu paling mindeng dipaké kiwari ngarujuk ka Ernst Mayr, nyaéta "golongan populasi alami nu bisa kawin antarsasama nu sacara réproduktif misah ti golongan lianna nu sahambalan". Najan kitu, konsép séjén gé sok dipaké (baca harti spésiés di handap).

Pikeun gambaran, jumlah spésiés nu geus diidéntifikasi bisa dibagi kana sababaraha golongan [1]: 287.655 tutuwuhan; 10.000 lukut; 1.190.200 invertebrata (kaasup 950.000 serangga); jeung 57.739 vertebrata, nu ngawengku 28.500 lauk, 5.743 ampibi, 8.163 réptil, 9.917 manuk, sarta 5.416 mamalia.

Ngaran ilmiah hiji spésiés ditulis déngdék. Mun nujul ka spésiés nu can kanyahoan, mangka kecap kaduana ditulis "sp." (tunggal) atawa "spp." (loba).

Artikel ieu mangrupa taratas, perlu disampurnakeun. Upami sadérék uninga langkung paos perkawis ieu, dihaturan kanggo ngalengkepan.