Laksa
- Pikeun kagunaan séjén, tempo Laksa (disambiguasi).
Laksa mangrupa olahan anu teu ngan sakur kakoncara di Indonésia, tapi ogé kawentar di Asia Tenggara siga di Singapur, Malaysia, jeung Thailand.[1] Laksa nyaéta olahan tina emih anu dibéré samara luyu jeung budaya peranakan campuran tina budaya Tiongkok jeung Melayu.[1] Ngaran laksa mangrupa serepan tina basa Sanskerta nyaéta laksha anu hartina "loba", maksudna yén laksa dijieun ngagunakeun loba bungbu.[1]
Laksa miboga sababaraha wanda, anu paling kakoncara nyaéta Laksa Penang.[2] Laksa penang nyaéta laksa anu emihna buleud bodas sarta leuwih kandel.[2] Sedengkeun laksa anu paling umum kapanggih jaman kiwari nyaéta laksa Bogor jeung laksa Betawi.[2] Bédana, kuah laksa Betawi biasana maké udang rebon, sedengkeun laksa Bogor kuah kentalna maké oncom.[1] Dina segi eusina gé béda, laksa Betawi biasana dieusi endog, kupat, togé, surawung, jeung kucai didahar jeung semur Betawi.[1] Sedengkeun laksa Bogor eusina maké kupat, bihun, togé, suwiran daging hayam, hurang, jeung endong kulub, biasana didahar maké sambel cuka.[1]
Laksa Nusantara[édit | édit sumber]
Salian ti laksa Bogor jeung laksa Betawi, aya sababaraha wanda resep laksa anu umum diolah ku masarakat Nusantara, di antarana nyaéta:[3]
- Laksa goréng, laksa anu teu maké kuah sarta emihna diganti maké emih spageti;[3]
- Laksa gedang (ala Singapur), laksa anu maké bahan gedang ngora ditambah buncis, kerang laut, tahu, tempe, sarta kuahna kentel kucipati;[3]
- Laksa hayam, hampir sarua jeung laksa Bogor;[3]
- Laksa hurang, hampir sarua jeung laksa Bogor tapi daging hayamna diganti ku hurang;[3]
- Laksa hayam endogan peutey, laksa hayam anu maké endog jeung peuteuy;[3]
- Laksa hayam soun, laksa hayam maké bihun;[3]
- Indomie laksa Singapur, laksa anu emihna maké mie instan;[3]
- Laksa Singapur, laksa has ti singapur anu campuranna maké daging hayam campur hurang;[3]
- Laksa penang, laksa anu maké bahan lauk laut.[3]