Saléh Danasasmita

Ti Wikipédia Sunda, énsiklopédi bébas
Jalan Saléh Danasasmita, Bogor.

Saléh Danasasmita (Sumedang, 7 Juni 1933 - Bogor, 8 Agustus 1986), ahli sajarah Sunda, sastrawan, rédaktur.

Babad salira[édit | édit sumber]

Saléh Danasasmita lulusan Jurusan Sejarah IKIP Bandung éksténsi Bogor, loba diajar sacara otodidak ngeunaan sajarah Sunda, kaasup diajar basa Kawi katut aksara Sunda. Ku jalan kitu, anjeunna bisa maca sarta naliti naskah-naskah, utamana Sunda buhun kalawan daria.

Taun 1957, babarengan jeung sawatara sastrawan Sunda lianna, anjeunna ngadegkeun—tuluy jadi salah saurang rédaktur—majalah Manglé. Ti taun 1961 nepi ka 1963, anjeunna mingpin majalah Baranangsiang, nu medal di Bogor.

Tulisan-tulisan anjeunna dina basa Sunda ngeunaan sajarah Sunda dimuat dina Manglé, Baranangsiang, Hanjuang, jeung Sipatahunan. Lian ti ngaguar sajarah Sunda, Saléh ogé remen nulis ngeunaan kasenian Sunda jeung sakapeung sok nulis sajak, dangding, jeung carpon.

Saléh kungsi ngawulang di SMP, SMA, jeung SPG. Kungsi ogé nyepeng kalungguhan Kasi Tenaga Téknis Bidang Muskala Kanwil Dépdikbud Jawa Kulon (1982 - 1986). Di Bogor, anjeunna kungsi jadi anggota DPRD Kodya Bogor (1964 - 1967).

Karyana[édit | édit sumber]

Buku-bukuna nu geus medal di antarana Séwaka Darma, Sanghyang Siksa Kanda ng Karesian, Amanat Galunggung (1987), Babad Pajajaran (1977), Sejarah Jawa Barat (1984), jeung Sejarah Bogor (1983).

Rujukan[édit | édit sumber]