Taman Nasional Glacier

Ti Wikipédia Sunda, énsiklopédi bébas
Loncat ke navigasi Loncat ke pencarian
Taman Nasional Glacier
IUCN Kategori II (Taman Nasional)
Mountain Goat at Hidden Lake.jpg
Embé gunung, simbol resmi taman, diluhureun Hidden Lake
Peta memperlihatkan letak Taman Nasional Glacier
Lokasi Taman Nasional Glacier di Amérika Sarikat
LokasiFlathead County jeung Glacier County, Montana, Amérika Sarikat
Kota pangdeukeutnaColumbia Falls, Montana
Lega1,013,322 acres (4,100.77 km2)[1]
Diadegkeun11 Méi 1910
Nu nganjangan2.965.309 (tahun 2018)[2]
Pihak nu ngokolakeunNational Park Service
RamatlokaLoka resmi
Loka Warisan Dunya UNESCO
Bagian tiTaman Padaméyan Internasional Waterton-Glacier
KritériaNatural: vii, ix
Rujukan354
Inskripsi1995 (19 Session)
Peta Taman Nasional Glacier

Taman Nasional Glacier nyaéta taman nasional anu perenahna di nagara bagian Montana, Amérika Sarikat beulah kulon-kalér. Taman nasional ieu boga wates jeung taman nasional anu ngaranna sarua di Kanada. Taman Nasional Glacier kawentar ku kaénndahanana.[3]

Sajarah[édit | édit sumber]

Bukti yén manusa geus manggihan wewengkon Glacier geus kapanggih 10.000 taun ka tukang. Nalika bangsa Éropa mimiti datang ka dieu, geus aya babaraha urang Indian anu nyicingan wewengkon ieu. Diantarana urang Indian Blackfeet anu ngawasaan tegalan di wétaneun pagunungan, jeung urang Indian Salish jeung Kootenai anu nyicingan landeuh beulah kulon, anu indit ngaliwatan pagunungan pikeun moro munding gedé di wewengkon wétan.[4]

Lolobana, urang Éropa anu kadieu téh pikeun néangan berang-berang jeung kulit nu séjénna. Tuluy dituturkeun ku tukang tambang jeung anu néangan tanah. Di taun 1891, sanggeus pangwangunan Jalur Karéta Api Kalér bérés, ngamungkinkeun réa jelema pikeun nyicingan wewengkon kulon Montana. Lolobana nyicingan landeuh di kuloneun Marias Pass, anu antukna diwangun kota-kota leutik anu mekar.[4]

Lila-kalilaan, loba jelema anu sadar yén ieu wewengkon téh miboga kaéndahan jeung pamandangan anu hadé. Di tungtung 1800-an, pamingpin anu miboga pangaruh, saperti George Bird Grinnell, ngusulkeun wewengkon ieu jadi taman nasional. Tuluy di taun 1910, Présidén Amérika Sarikat anu ka-27, Willian Howard Taft, satuju ku usulan éta, sarta nganandatangan undang-undang anu netepkeun Glacier minangka taman nasional anu ka-10 di Amérika Sarikat.[4]

Ékosistem[édit | édit sumber]

Tutuwuhan[édit | édit sumber]

Minangka tempat patepungna opat wewengkon tutuwuhan, ékosistem Taman Nasional Glacier ngarojong kana kahirupan réa spésiés pepelakan jeung komunitas tutuwuhan. Taman Nasional Glacier miboga 30 spésiés anu éndemik, anu ngan bisa kapanggih di Pagunungan Rocky bagian kalér. Lingkungan terbuka di wewengkon ieu condong ka tiris. Loba titinggal ti jaman pasca-glasial anu aya di dieu ku lantaran kombinasi kondisi lingkungan anu antukna nyiptakeun habitat mikro anu unik.[5]

Tilu Daerah Aliran Sungai utama di Amérika Kalér muncul ti taman nasional ieu (Arktik, Atlantik, jeung Pasifik). Dua zona iklim (Maritim Pasifik jeung Arktik) dipisahkeun ku Gurat Kontinental (Continental Divide).[5]

Loba bioma anu aya di dieu ti mimiti leuweung cedar-hemlock di dataran handap, nepi ka alpine tundra. Variétas pepelakan anu aya di beulah kalér béda jeung anu di beulah kidul, ku sabab wewengkon kalér kaasup kawasan hutan hujan Whitefish Range. Tangkal cedar-hemlock méré jalan pikeun ngagaringkeun tangkal camara di Douglas jeung di North Fork.[5]

Wewengkon tutuwuhan[5][édit | édit sumber]

  • Cordellian (49%), kaasup Pagunungan Rocky bagian kidul jeung tengah jeung Pagunungan Cascade di Pasifik Kulon-kalér.
  • Boréal (39%)
  • Arktik-Alpine (10%)
  • Great Plains (1%)

Sasatoan[édit | édit sumber]

Embé gunung jeung anakna, di Hidden Lake.

Ku sabab kaayaan alam Taman Nasional Glacier anu rupa-rupa, nyababkeun rupa-rupa jinis sasatoan cicing di dieu, saperti ampibia, aves, pisces, insékta, mamalia, jeung réptilia.[6]

Ampibia[édit | édit sumber]

Taman Nasional Glacier miboga walungan-walungan anu panjangna leuwih ti 2.400 kilométer, 700 situ, balong, ranca, sarta habitat baseuh séjénna. Habitat ieu penting pisan pikeun kahirupan ampibi di ieu wewengkon. Sanajan kitu, ngan aya genep spésiés ampibi anu nyicingan taman nasional ieu, ku sabab cairna és pléistosén mangka kaanékarageman ampibi jadi kawates.[7]

Genep spésiés ampibi anu aya di Taman Nasional Glacier nyaéta Bangkong Kulon (Anaxyrus boreas), Bangkong Tutul Kolumbia (Rana luteiventris), Bangkong Buntutan Pagunungan Rocky (Ascaphus montanus), Bangkong Tangkal Pasipik (Pseudacris regilla), Bangkong Boreal Chorus (Pseudacris regilla), jeung Salamander Ujung Panjang (Ambystoma macrodactylum).[7]

Ayana ampibi di taman nasional ieu boga pungsi anu penting dina jaring dahareun pikeun ékosistem jeung mahluk hirup nu séjén. Ampibi sok ngadahar lancah, cacing, kéong, jeung gegeremet sabangsaning reungit jeung laleur, sarta sok dijadikeun dahareun ku oray, manuk, berang-berang walungan, jeung lauk.[7]

Aves[édit | édit sumber]

Leuwih ti 260 spésiés manuk anu aya di Taman Nasional Glacier, jumlah ieu kaitung réa pikeun wewengkon Amérika Kalér. Kondisi iklim anu diciptakeun ku Gurat Kontinéntal ngahasilkeun habitat cai, riparian, jeung téréstrial anu cocog pikeun manuk. Babaraha jinis manuk éndemik di ieu taman nasional nyaéta American Dipper (Cinclus mexicanus), Clark’s Nutcracker (Nucifraga columbiana), Common Loons (Gavia immer), Élang (Haliaeetus leucocephalus), Harleqiun (Histrionicus histrionicus), Bueuk Northern Hawk (Surnia ulula), Osprey (Pandion haliaetus), Ptarmigans (Lagopus leucurus), jeung Swift.[8]

Pisces[édit | édit sumber]

Lolobana, lauk anu aya di Taman Nasional Glacier nyaéta lauk anu dihaja dipelak, diantarana, rainbow trout, brook trout, Yellowstone cutthroat trout, kokanee, lake whitefish, jeung grayling. Dipelakna lauk-lauk éta utamana pikeun rékréasi (nguseup).[9]

Tuluy, di taman nasional ieu, aya babaraha situ anu émang euweuh laukan, tapi dihaja dipelakan.[9]

Sanajan kitu, masih aya lauk asli ti taman nasional ieu, saperti bull trout, westslope cutthroat trout, largescale suckers, northern pikeminnow, redside shiners, peamouth, sarta babaraha spésiés sculpins, anu nyicingan beulah kulon. Lauk anu dipelak nimbulkeun anceman pikeun kahirupan lauk éndemik asli.[9]

Insékta[édit | édit sumber]

Bakating ku lobana, para ilmuwan can bisa nuliskeun daptar insékta anu aya di Taman Nasional Glacier. Unggal taunna, ilmuwan manggihan baé spésiés anyar gegeremet, tumbila, atawa lancah.[10]

Di lima aréa taman, aya kira-kira 10 nepi ka 30 koloni kukupu Yellowstone checkerspot. Maranéhna ngan ngendog di luhureun daun bearberry hideung di tempat anu caang jeung baseuh.[10]

Mamalia[édit | édit sumber]

Aya 71 spésiés mamalia anu nyicingan Taman Nasional Glacier. Taman nasional anu pohara legana ngarojong pisan kana ékosistem mamalia. Babaraha mamalia anu aya di taman nasional ieu nyaéta kalong, biruang, berang-berang, domba tanduk gedé, rusa gedé, lynx (ucing liar Amérika Kalér), embé gunung, singa gunung, pikas, jeung srigala.[11]

Réptilia[édit | édit sumber]

Usum tiris jeung tingkat kaluhuran anu luhur di tamna nasional ieu nyababkeun jumlah réptil nu aya di dieu saeutik. Ku sabab réptil mangrupa sato ékotérmik, hartina maranéhna ngumpulkeun panas awak ti lingkunganna. Ngan aya tilu spésiés réptil di Taman Nasional Glacier, nyaéta oray garter, kuya kulon, jeung oray rubber.[12]

Pariwisata[édit | édit sumber]

Poténsi pariwisata di Taman Nasional Glacier pohara gedéna. Hal ieu disababkeun ku kaéndahan alam jeung ékosistemna. Kira-kira aya 2,9 juta urang anu kungsi nganjang ka dieu. Sanajan di usum semi, urang bisa nempo salju nepi ka bulan Juni. Di dieu, babaraha kagiatan rékréasi anu bisa dilakukeun nyaéta kémping, naék gunung, naék kuda, ngojay, nérékél kana tebing, sasapédahan, jeung paparahuan.[13]

Galéri[édit | édit sumber]

Tingali ogé[édit | édit sumber]

Taman nasional

Rujukan[édit | édit sumber]

  1. "Listing of acreage as of December 31, 2011". Land Resource Division, National Park Service. Diakses tanggal March 6, 2012. 
  2. "NPS Annual Recreation Visits Report". National Park Service. Diakses tanggal March 7, 2019. 
  3. "Taman Nasional Glacier". Expedia.com. Diakses tanggal 10 Désémber 2019. 
  4. a b c Glacier, Mailing Address: PO Box 128 West; Us, MT 59936 Phone:888-7800 Contact. "History & Culture - Glacier National Park (U.S. National Park Service)". www.nps.gov. Diakses tanggal 2019-12-10. 
  5. a b c d Glacier, Mailing Address: PO Box 128 West; Us, MT 59936 Phone:888-7800 Contact. "Plants - Glacier National Park (U.S. National Park Service)". www.nps.gov. Diakses tanggal 2019-12-11. 
  6. Glacier, Mailing Address: PO Box 128 West; Us, MT 59936 Phone:888-7800 Contact. "Animals - Glacier National Park (U.S. National Park Service)". www.nps.gov. Diakses tanggal 2019-12-11. 
  7. a b c Glacier, Mailing Address: PO Box 128 West; Us, MT 59936 Phone:888-7800 Contact. "Amphibians - Glacier National Park (U.S. National Park Service)". www.nps.gov. Diakses tanggal 2019-12-11. 
  8. Glacier, Mailing Address: PO Box 128 West; Us, MT 59936 Phone:888-7800 Contact. "Birds - Glacier National Park (U.S. National Park Service)". www.nps.gov. Diakses tanggal 2019-12-11. 
  9. a b c Glacier, Mailing Address: PO Box 128 West; Us, MT 59936 Phone:888-7800 Contact. "Fish - Glacier National Park (U.S. National Park Service)". www.nps.gov. Diakses tanggal 2019-12-11. 
  10. a b Glacier, Mailing Address: PO Box 128 West; Us, MT 59936 Phone:888-7800 Contact. "Insects, Spiders, Centipedes, Millipedes - Glacier National Park (U.S. National Park Service)". www.nps.gov. Diakses tanggal 2019-12-11. 
  11. Glacier, Mailing Address: PO Box 128 West; Us, MT 59936 Phone:888-7800 Contact. "Mammals - Glacier National Park (U.S. National Park Service)". www.nps.gov. Diakses tanggal 2019-12-11. 
  12. Glacier, Mailing Address: PO Box 128 West; Us, MT 59936 Phone:888-7800 Contact. "Reptiles - Glacier National Park (U.S. National Park Service)". www.nps.gov. Diakses tanggal 2019-12-11. 
  13. "Recreation.gov". Recreation.gov. Diakses tanggal 2019-12-11.