Haphap

Haphap
	Haphap atawa cekibar
Klasifikasi ilmiah
Filum:	Chordates
Subfilum:	Vertebrata
Kelas:	Reptilia
Ordo:	Squamata
Subordo:	Sauria
Superfamili:	Acrodonta
Kulawarga:	Agamidae
Subfamili:	Draconinae
Génus:	Draco
Spésiés:	D. volans
Ngaran binomial
	Draco volans; Linnaeus, 1758

Haphap atawa cekibar nyaéta sato jenis réptil nu kaasup suku (familia) Agamedae.^[1] Kadal liana nu masih sasuku nyaéta londok jeung soa-soa (Hydrosaurus sp.). Haphap saenyana mah teu kaasup dulur tina cakcak upamana siga toké (suku Gekkoidae). Sato kadal nu bisa ngapung ieu ilahar kapanggih di pulo Jawa. Ngaran ilmiahna nyaéta Draco volans Linnaeus, 1758. Ngaran lokal di unggal wewengkon rupa-rupa, dina basa Sunda mah disebut haphap, Batawi cekibar, basa Jawa celérét gombél atawa klarap. Ana pon dina basa Inggris disebut gliding lizards atawa flying dragon. Ieu sato téh sumebar ti mimiti Thailand jeung Semenanjung Malaya di kulon; kapuloan Filipina di kalér; Sumatra, Mentawai, Riau, Natuna, Bornéo, Jawa, Nusa Tenggara, Sulawesi, nepi ka Maluku di wétan.

Ciri-cirina

Ieu kadal téh ukuranana kaasup leutik, panjang totalna kira-kira 200 mm. Patagium (“jangjang”) nyaéta genep pasang tulang iga nu manjang kaluar dibungkus ku kulit. Sisi luhur “patagium” kelirna konéng nepika oranyeu, aya tutul-tutul hideungan. Sisi handapna abu-abu semu konéng, aya tutul-tutul hideungan ogé. Huluna rada korodok semu masagi. Dina beuheungna aya “salempay” anu bisa dibuka-tutup warnana konéng (jalu) atawa biru cerah (bikang). Di sisi tukang huluna aya “makuta” nu wangunna rérégéan semu cucukan. Matana has kadal agamid. Dorsal (sisi luhur awak) warnana coklat nepi ka semu hideung atawa abu-abu, warnana bisa baganti jadi leuwih poék atawa nyaangan upama ngarasa kaganggu. Sapanjang tulang tonggongna aya pola tutul hideung anu perenahna rapih: ti mimiti ubun-ubun, satukakeun hulu, punduk, tuluy ngagedéan jeung robah jadi pola hideung semu soklat satengah buleud di tilu titik dina tonggong (dorsum) jeung hiji dina puhu buntut. Ieu pola warna téh mangrupa “baju” anu hadé pikeun nyumput dina papagan tatangkalan. Ventral (sisi handap awak) abu-abu semu bodas, rada héjo di sisi médial (garis tengah awak); aya titik-titik semu soklat dina lebah lateral (sisi kénca-katuhu awak). Buntutna kira-kira 1,5 kali panjang awakna; tungtungna welang kalawan aya sisitan anu kuat ngahiji.

Kabiasaan

Haphap biasa kapanggih di buruan, kebon, jeung leuweung. Mindeng ogé ieu sato téh katohyan keur moro serangga dina papagan tangkal. Kadang-kadang haphap pindah tina tangkal ka tangkal séjénna ku cara “ngapung”, nyaéta luncat tuluy ngalayang maké “jangjangna”. Lamun keur usum begér, mindeng kapanggih haphap jalu keur ngungudag bikangna dina satangkal. Haphap neundeun endog dina jero taneuh nu béar atawa humus deukeut tangkal. Bikangna ngali taneuh maké sungutna.

Klasifikasi genus Draco

(Sabangsaning Haphap)

Referensi

http://id.wikipedia.org/wiki/Cecak_terbang
http://en.wikipedia.org/wiki/Draco_volans
http://en.wikipedia.org/wiki/Draco_(genus)
http://commons.wikimedia.org/wiki/Category:Draco

Dicutat tina

↑ Rigg, Jonathan (1862). A Dictionary of the Sunda Language of Java. Jakarta: Bataviaasch Genootschap van Kunsten en Wetenschappen. ISBN '- Check |isbn= value (bantuan).

[“Jonathan-1] Rigg, Jonathan (1862). A Dictionary of the Sunda Language of Java. Jakarta: Bataviaasch Genootschap van Kunsten en Wetenschappen. ISBN '- Check |isbn= value (bantuan).

[1]