Ambika

Dina Mahabarata, Ambika (basa Sansakerta: अम्बिका) nyaéta puteri ti Raja Kasi sarta pamajikanna Wicitrawirya, Raja Astinapura.

Babarengan jeung barayana, Amba sarta Ambalika, manéhna dibeunangkeun ku Bisma dina hiji sayémbara (Bisma nangtang para raja sarta pangéran anu ngariung tuluy nalukkeun maranéhanana). Bisma nyerahkeun maranéhanana ka Satyawati pikeun didahupkeun ka Wicitrawirya. Tapi Wicitrawirya pupust dina umur nu ngora saméméh méré turunan pikeun Ambika.

Sanggeus pupusna Wicitrawirya, Satyawati boga paménta ka Resi Abiyasa pikeun neruskeun garis turunan Dinasti Kuru. Luyu jeung kahayang Satyawati, Sang Resi ngadatangan dua pamajikan Wicitrawirya pikeun méré turunan. Waktu Abiyasa ngadatangan manéhna, Ambika nempo rupa Abiyasa pohara pikasieuneun sarta dedeganna sangar sarta panon anu hurung. Dina kaayaanana anu sieun, manéhna nutupan panonna sarta henteu wani beunta. Mangka ti éta, anakna nu lahir, Drétarastra lahir lolong.

Sanggeus kalahiran Drétarastra, waktu Satyawati ménta abiyasa pikeun ngadatangan Ambika nu kadua kalina, Ambika henteu daék datang sarta ngirimkeun dayang gaganti dirina. Mangka si ladén ngalahirkeun Widura, anu saterusna diasuh jadi adi Drétarastra jeung Pandu.

Ambika hirup sawatara lila nepi ka mibanda incu, nyaéta Pandawa jeung Kurawa. Sabot Pandu mangkat, Satyawati ngajak Ambika pikeun ngasingkan diri ka leuweung, demi ninggalkeun kahirupan kadunyaan. Kahayang kasebut disatujuan ku Ambika. Babarengan jeung Ambalika, maranéhanana tiluan indit ka jero leuweung ninggalkeun Astinapura, sarta ngantep penerus Dinasti Kuru nangtukeun nasibna sorangan.

Tempo ogé

• Ambalika