Dadap
| Dadap | |
|---|---|
| |
| Dadap, Erythrina variegata. digambar ku Blanco. | |
| Klasifikasi ilmiah | |
| Karajaan: | |
| Divisi: | |
| Kelas: | |
| Ordo: | |
| Kulawarga: | |
| Subfamili: | |
| Tribus: | |
| Génus: | |
| Spésiés: | E. variegata
|
| Ngaran binomial | |
| Erythrina variegata | |
| Sinonim | |
|
E. indica Lam. | |
Dadap (Erythrina variegata) nyaéta tangkal anu asalna tina kulawarga Fabaceae.[1] Loba kapanggih dimangpaatkeun pikeun pager hirup jeung tangkal pangiuhan di sisi jalan.[1][2] Urang Jawa nyebut dadap téh dadap ayam atawa dadap laut; urang Madura nyebutna theutheuk ; di Bali disebutna dalungdung; di Timor disebutna deris; urang Maluku nyebutna galala itam.[1]
Di sababaraha Nagara Asia, tangkal dadap ogé loba kapanggih hirup kalawan mibanda ngaran atawa sebutan anu béda-béda: dapdap, andorogat (Fil.); th'ong banz (Laos (Sino-Tibetan)); thong baan, thong laang laai, thong phueak (Thai); penglay-kathit (Burma); Indian coral tree, variegated coral tree, tiger's claw (Ingg.); arbre au corail, arbre immortel (Fr.) jeung réa-réa deui.[1]
Tangkal dadap hirup kalawan subur di daérah anu jemlék rada garing meueusan, kalawan turun hujan 800 – 1500 mm dina sataun atawa 5-6 usum hujan. Loba kapanggih hirup ti mimiti sisi basisir anu perenahna 1500 m dpl (luhureun beungeut cai laut). Dadap bisa hirup dina taneuh anu keusikan, ngandung uyah, taneuh anu mindeng kakeueum ku cai, kitu ogé taneuh apu.[3]
Pedaran
[édit | édit sumber]Tangkal dadap déwasa jangkuna kurang leuwih 15–20 m kalawan gedé tangkalna 50–60 cm.[4] Tangkalna anu masih ngora kénéh kelirna héjo semu paul, coklat ngora, aya ogé semu bodas.[4] Mangsa geus ngolotan tangkalna bijil cucuk laleutik (1–2 mm) kelirna hideung.[4] Dadap mah tangkalna henteu pati kékép, dauna ngajumpluk, tur ngarangrangan mangsa datang usum halodo.[4]
Daun bijil tilu lambar dina cacupat, kelirna héjo tur hejo ngora mangsa pucuk kénéh, gagang daun ka cupatna panjang kurang leuwih 10–40 cm.[5]
Kembangna bijil tina tungtung régang, ngaranggeuy wanguna lencop, ngéntép dina sikatanna, ieu kembang téh ilaharna merentis mangsa daunna ngarangrangan.[5] kelirna beureum euceuy nepika beureum kolot, mangsa geus ligar gedéna 5,5-8 × 8 cm.[5] Sikina aya dina jero polong anu kandel tur kelirna semu hideung, ngarempet ngawangun siki-siki anu aya disajerounna, 15–20 cm × 1.5–2 cm, dina unggal polong aya 5-10 siki wanguna kawas endog lalonyod, kelirna kopi, aya ogé anu beureum, gandaria kolot.[3]
Kagunaan
[édit | édit sumber]Tangkal dadap dimangpaatkeun pikeun pangiuh di kebon-kebon kopi jeung coklat, tangkal rambatan pedes, seureuh, paneli atawa hui gadung.[3] Bisa waé dipaké tihang-tihang pager hirup.[3] Di daérah pasifik mah tangkal dadap dimangpaatkeun pikeun ngurangan tarikna angin.[4]
Tangkal dadap ngahasilkeun kai anu kelirna bodas, watekna hampang (BJ 0,2-0,3), hipu, sok dimangpaatkeun pikeun nyieun kukumbul, soko boboko, peti-peti wadah buah, pigura, jeung rupa-rupa kaulinan budak.[1] ka dieunakeun kai dadap geus dicoba ogé pikeun nyieun bubur kertas pulp.[3] Kai dadap mah teubisa dipaké pikeun suluh ku lantaran besem tur ngelun haseupna.[1][3]
Dauna bisa dimangpaatkeun pikeun ibu-ibu anu keur nyusuan sangkan loba cai susuna, ngubaran anu hése saré, kembangna ogé bisa dimangpaatkeun pikeun ngalancarkeun datang bulan atawa haid.[6] Nginum cai peresan daun dadap tuluy dicampurkeun jeung madu bisa nyageurkeun panyakit cacingeun jeung peujit murilit (disentri).[3] Daun beunang ngaleumpeuh (didéang dina seune lepika layu) tuluy ditaplokeun kanu karasa nyeuri alatan reumtik.[3]
Daun-daun dadap ogé dimangpaatkeun pikeun parab ingon-ingon ogé gemuk pepelakan.[7] Ieu alatan dina daun dadap mibanda protein jeung nitrogen kawilang loba.[7] Dadap anu gedé mejeuhna bisa dituar 3-4 kali dina sataun, kalawan ngahasilkeun 15-50 kg parab ingon-ingon dina sataun.[7] Salila ieu daun dadap tacan aya kabejakeun ngabalukarkeun weureu pikeun ingon-ingon (toksik) .[3] Melak tangkal dadap diburuan bisa ngabantu nyuburkeun taneuh ku sabab, bakteri Bradyrhizobium anu aya dina tangkal dadap bisa neundeun nitrogen tina hawa di luar.[1] Dadap ogé bisa dipaké pikeun ngabasmi hama Inséktisida .[7]
Kandungan Racun
[édit | édit sumber]Hasil panalungtikan dina taun 1980-an nétélakeun yén dina daun, tangkal, jeung buah dadap mibanda sababaraha racun anu disebut asam hidrosianida, eritrina, alkaloid, jeung hipaforin.[7] Sahenteuna kungsi dipecakan ka Bangkong, anu dibéjakeun cenah éta bangkong leuwih tanginas dina luncatna.[7] Ngan waé engké dina turunan éta bangkong (derivative-na), di mana kainum cai dadap bisa ngabalukarkeun éta bangkong jadi lumpuh.[7]
Katangtuan melak
[édit | édit sumber]Melak tangkal dadap bisa tina siki atawa potongan tangkalna.[3] Siki-siki dadap saméméhna pelakkeuneun kudu dikeueum heula dina cai haneut (80 °C) kurang leuwih 10 menit, tuluy dikeueuman ku cai biasa sapeuting, kakara isukana dibungbun (dicecebkeun kana taneuh).[3] ieu siki baris kaluar sirung sabada 8-10 poé, téréh gedé tur jangkung dina waktu 8-10 minggu jangkungna geus nepi ka 30–50 cm dalam.[3] Melak ku jalan distek tangkalna, teukteuk dahan dadap kurang leuwih panjang 2–3 m jeung gedéna 2–5 cm, tunda heula sapoé sapeuting sangkan henteu gancang buruk diserang supa. isukna kakara ditancebkeun.[3]
-
Kembang dadap dieuneupan manuk jalak surén (Sturnus contra) -
Daun-daun dadap -
Tangkal dadap mangsa ngarangrangan daun -
Tangkal dadap ker ngemploh héjo
_feeding_on_Indian_Coral_Tree_(Erythrina_variegata)_in_Kolkata_I_IMG_4005.jpg)
Dicutat tina
[édit | édit sumber]- ↑ a b c d e f g ICRAF Agroforestry Tree Database: Erythrina variegata L.[tumbu nonaktif]
- ↑ Jonathan, Rigg (1862). A Dictionary of the Sunda Language of Java. Universitas Harvard: Bataviaasch Genootschap van Kunsten en Wetenschappen.
- ↑ a b c d e f g h i j k l m NFTA. 1994. Erythrina variegata: more than a pretty tree[tumbu nonaktif]. NFTA 94-02. Waimanalo.
- ↑ a b c d e Jensen, M. 1999. Trees Commonly Cultivated in Southeast Asia: an illustrated field guide. 2nd Ed. FAO - RAP Publication: 1999/13
- ↑ a b c Steenis, CGGJ van. 1981. Flora, untuk sekolah di Indonesia. PT Pradnya Paramita, Jakarta. Hal. 234-215.
- ↑ Heyne, K. 1987. Tumbuhan Berguna Indonesia, jil. 2. Yay. Sarana Wana Jaya, Jakarta. Hal. 1031-1033.
- ↑ a b c d e f g Dharma, AP (1987). Indonesian Medicinal Plants [Tanaman Obat Indonesia]. hal.60. Jakarta:Balai Pustaka. ISBN 979-407-032-7.
|
Artikel ieu mangrupa taratas, perlu disampurnakeun. Upami sadérék uninga langkung paos perkawis ieu, dihaturan kanggo ngalengkepan. |
Tutumbu Kaluar
[édit | édit sumber]- Christophe, Wiart (January 2006). Medicinal Plants Of The Asia-pacific: Drugs For The Future?. World Scientific. ISBN 9789814480338.
Tutumbu kaluar
[édit | édit sumber]
- Germplasm Resources Information Network: Erythrina variegata
- Flowers of India: Indian Coral Tree